Популарниот тандем Драган Спасов Дац и Александар Митевски, во чест на големиот македонски деец Блаже Конески, направија мелодија на негови стихови и ја отпееаја “Весела песна” со “Златните славејчиња”. Како што велат, овој певлив рефрен ќе остане за следното столетие, а нивната желба е да ги пренесат стиховите на Конески на младите генерации кои треба да продолжат да ги негуваат зборовите кои тој ги остави.
Во видео спотот што го снимија за оваа песна се прикажани некои подзаборавени детски игри кои се загубија во денешното брзо и модерно живеење. Со овогодинешните “Кумови Бадникари” Дац и Александар, во спотот се појавува и “Здравичарот”, уметникот Живко Поповски Цветин со своите колоритни цветни цртежи. За оваа песна, авторката и добар познавач на творештвото на Конески, Јагода Михајловска Георгиева изјави:
“На овие двајца хитмејкери, Александар и Дац им успеа нешто на што Конески веројатно никогаш не ни помислувал. Со нивната музичка нумера „Весела песна“ го внесуваат во естрадната зона. Преобликувајќи го во музички хит му го прошируваат полето на дејствување во димензија различна од досегашните. Би му се допаднало на Конески во друштвото на младите, би го радувало што неговите стихови се здобиле со музички крилја па го ослободуваат духот ширејќи ведрина. Да е овде би го рекол она неговото: „Ми се освежи душава“.
Песната и видео спотот беа промовирани на 15 февруари во “Трибека” пред нивните фанови и љубители на музика, а реализацијата на проектот ја помогна компанијата “Алкалоид Скопје”.
