Flip
На 29-ти август, во 20.00 часот, големата сцена на плоштадот во Куманово ќе блесне со традиционалното издание на Фестивалот на македонска народна шегобијна песна „Тумба Фест“ 2024. Организиран од здружението „РИЗНИЦА“, овој фестивал е повеќе од само музички настан – тој е уникатен културен феномен кој ги негува, промовира и сочувува македонските дијалекти како дел од нашето историско културно наследство.
„Тумба Фест“ е единствениот фестивал на светот кој ги слави македонските дијалекти преку музика и песни, со посебен акцент на кумановскиот дијалект. Во текот на годините, публиката имаше можност да ужива во песни на битолски, прилепски, гевгелиски и други дијалекти, а оваа година на ред доаѓаат дојранскиот, валандовскиот, кавадаречкиот, кривопаланечкиот, охридскиот и ресенскиот дијалект.
Посебен момент на фестивалот ќе биде интерпретацијата на песната за врањанецот кој ја посакува прекрасната Јовка, во изведба на гостинот од Врање, Бранимир Стошиќ – Каце, на врањскиот дијалект, кој е близок на македонскиот јазик. Ова ќе биде еден од незаборавните моменти на вечерта, заедно со песната за Дојранското езеро, каде се испреплетуваат македонскиот литературен јазик и дојранскиот и кавадаречкиот дијалект. Автор на оваа песна е легендарниот Љупчо Бубо Каров – Цацко, кој ќе настапи со Трио Гранде Плус.
Фестивалот ќе биде збогатен со изведби на некои од најпознатите македонски пејачи и групи, како Катерина Брезева и групата Соната, Ѓоко Ѓорчев и Јованка Јо, Круме Спасовски, Лени Партикова, Петар Нечовски, Ирена Спасовска, и многу други. Посебно задоволство ќе биде враќањето на примадоната на македонската народна песна, Маргица Антевска, која ќе ја исполни песната „К’т ќе дојдеш у Куманово“.
Фестивалот, кој има ревијален карактер, доделува две престижни награди – за животно дело и за најслушана песна помеѓу двата фестивала. Оваа година, очекувајте уште еден незаборавен настан кој го слави македонскиот јазик, хумор и традиции.
