Виктор Апостоловски – единствен пејач со цензурирана лозинка, препорачува да свртиме кон Петровец – имало аеродром!

Слични

Теологот Ацо Митев Ви порачува: надежта е сеуште на дофат, но единствено преку Исус Христос

Во моментите кога притисокот од секојдневните проблеми се надополнува...

Сподели

Го начекавме најлабавиот битолчанец како се игра со кутриња и го направивме интервјуто на годината!

Не дека е наше детево, ама навистина има моќни пораки што ги испраќа. Па затоа да не ве задржуваме со непотребен вовед, повелете Виктор – пеЈачо од Битола!

FLIP: Какво е чувството да си пeјач во Македонија?

В.А.: Чудно! Мнооогу чудно! Од една страна, луѓето те знаат, те виделе на ТВ или онлајн или како и да е, знаат кој си, а од друга страна — не си популарен бидејќи, нели, не си политичар или пак некоја драма личност. Од трета страна, си ја обожаваш работата и уживаш во секој дел од неа, од четврта страна — чуден народ, луѓето отсекогаш туѓото го ценеле, а нашето никако. Среќна околност е тоа што јас воопшто не се заморувам со такви работи, правам тоа што сакам во моментот и уживам. Си го возам филмот и ќе продолжам да си го возам сè додека не испаднат тркалата.

FLIP: Би ја менувал ли средината во потрага по инспирација?

В.А.: Не ми е важно каде се наоѓам, воопшто. Инспирација има секогаш и секаде, само  човек треба да сака да ја најде. 😁Кога би менувал средина, би ја променил од љубопитност бидејќи обожавам да запознавам нови места, нови луѓе и да научам по нешто за нивните култури.

FLIP: Како знаеш дека тоа што го работиш е она вистинското?

В.А.: Едноставно знаеш. Како знаеш кое ти е омилено јадење, омилен филм? Така е и со работата. Тоа што ти создава пеперутки, те исполнува или, како во мојот случај, те возбудува и те тера да изгубиш чувство за време и по неколку дена без спиење… Тогаш, тоа е тоа.😁

FLIP: Кога би бил десерт, кој прв би те пробал? 

В.А.: Пчелите… Или мувите… Зависи кој како ме гледа.😂FLIP: За што, најчесто, сонуваш кога си во студио?

В.А.: За поголемо студио. По можност, некаде покрај плажа, со сите коцки наредени… Лабаво, малку создаваш музика, малку се бањаш, мераци…😁FLIP: Дали се прашуваш како би реагирал лик од твојата песна на твоето секојдневје?

В.А.: Единствено нешто за кое се прашувам е што да се јаде следно.😂FLIP: Што, со сигурност, би понел со себе на пат околу светот?

В.А.: Телефон. Сè останато се средува по пат.😁FLIP: Што, за тебе, преставува сапуница?

В.А.: Нашата политичка сцена. Ако собереме сè што се случува во последниве 30 години, мислам дека имаме шоу 30 добри сезони. „Малечката невеста“ може вода да ни носи.

FLIP: Со која позната личност би се менувал на еден ден?

В.А.: Со Џеф Безос или Елон Маск. Не за друго, туку за да ги разбудат сабајле во 7, за помош на татко ми, утовар — растовар.😂FLIP: Стан или куќа, море или планина?

В.А.: Куќа и море. Ако има и планина од задната страна на куќата — мераци.

😁

FLIP: Која ти е лозинката на Wi-Fi?

В.А.: (ТИИИИИТ) (сепак е предизборие)

FLIP: Постои ли твој двојник таму некаде? Каков е?

В.А.: Шутрак невиден е и тој, гарант.😂 Ако го сретнеш некаде, пушти го наваму. Не се стига сè сам.😂FLIP: Дали имаш свои цитати и кој е твојот омилен?

В.А.: Цитати немам. Не се чувствувам до толку „возвишен“ (засега).😂 … Ама имам стихови… На пример: „Оној што глуми трезен, стално изрека си бара, оној што глуми ангел, стално пропаѓа во бара. Додека глумиш живот, убаво изгледа од страна, но што кога претставата ќе стане монодрама?“

FLIP: Извлече ли поука од пандемијата? Можеш ли да ни ја кажеш?

В.А.: Живеј! Прави го тоа што сакаш да го правиш. Не чекај бидејќи животот нема да те чека тебе. Што и да правиш, сонцето ќе изгрева секое утро. Колку побрзо го сфатиш тоа — поубав ќе ти биде животот.😁FLIP: Што мириса подобро: свежо искосена трева или тазе домашен леб?

В.А.: Лепче. Особено кога пазиш на исхраната… Мхм..😁FLIP: Што си помислуваш прво кога ќе се разбудиш?

В.А.: Кај ми е телефонот?😂FLIP: Би облекол ли две леви патики? Или, зошто не две десни?

В.А.: Пошто кој со ѓаолот тикви сади…, книгата нема дно.😉😂FLIP: Која ти е омилената жица од гитара?

В.А.: Скинатата.😂

FLIP: Кој лик обожаваш да го имитираш?

В.А.: „Колку чини здравецот? — Шес месееци!“

FLIP: Зошто Македонија нема море?

В.А.: Зависи кај си. Во Битола (Прилеп итн.) има море на секој втор збор. Пример: „Шо наааапрај моооррее? Глата ја искрши! Цццц… Море, море, море абдал…“ Мориња колку сакаш…😁FLIP: Кога ќе се случи македонскиот музички бум со нови песни, автори и музичари? 

В.А.: На денот кога Македонците ќе почнат да си се почитуваат меѓу себе. Дотогаш многу одлични артисти и музичари ќе свират само за малиот број граѓани што почитуваат.

FLIP: Како да свртиме кон подобро?

В.А.: Е сега види вака… По прва наплатна не продолжуваш право, туку вртиш лево кон Петровец. Има таму, ќе видиш, едно место. Александар Велики се вика. Аеродром е. Ќе си купиш карта, ќе прошеташ малку по светот, ќе видиш како се држат и се поддржуваат луѓето, ќе видиш колку никој не се заморува со глупостите со кои се заморуваме ние тука. Ќе видиш колку почит и поддршка си даваат меѓу себе и така растат заедно како нации. И не ги интересира кој има повеќе, кој што има и што нема, не се оговараат, не се туркаат и понижуваат, туку работат сите на себе како волови — подобрување и поддржување на сè што вреди. Така и колективно растат. И потоа, ќе се вратиш и ќе го примениш тоа тука. Е сега, на почеток, постојано ќе бидеш напаѓан и критикуван зашто сите ќе те користат, но ако доволно луѓе го издржат тој тежок период и ако поттикнат други да им се приклучат за да направат домино ефект, здравје боже, за едно 3-4 генерации ќе почнат да се случуваат промени. Во блиска иднина веројатно ќе биде тешко зашто се работи за борба за преживување.

error: Content is protected !!